在香港各國咖哩都唔難搵到，我就特別喜歡日式咖哩，可能因為口味偏甜。各大超市都容易買到日本咖哩磚，自己煮都好方便。
甘荀、洋蔥、薯仔及肉類 (今晚用咗牛肉)，分量隨意。
做法:
1. 甘荀、洋蔥、薯仔切小塊備用
2. 炒香牛肉粒備用
3. 先炒香洋蔥，爆香至金黃色 (如果想上碟時食到洋蔥，就將炒好的洋蔥留起一部份，到最後再加入，因為洋蔥煮得耐就會溶化)
4. 再加入甘荀及薯仔略炒，然後加入牛肉粒
5. 加水入鍋 (份量要視乎咖哩磚份量，盒底會有說明)
6. 煮至各樣材料軟，就加入咖哩磚，攪拌至溶化，再煮滾就可上碟
煮日式咖哩還有兩個小密技:
1. 加咖哩磚時，要轉用小火甚至離火，因為咖哩磚遇上猛火會易燶變苦，而且越煮會越稠，所以不要太早加入咖哩磚
2. 上碟前可以加入1小杯 (或半杯) 咖啡，我會用即磨咖啡，不過即溶咖啡亦可，會有意外的香味。不過，一般日式咖哩才會加咖啡。不要亂加咖啡去印度或泰式咖哩。