甜品呢家野真係好個人口味，對於歐美人仕，相信大部份都會覺得香港甜品好淡，而我就同大部份香港人一樣接受唔到太甜。以前英國同事每年到香港必然送一大盒朱古力，結果係一開盒個個都要賞面食一粒，之後嗰盒朱古力嘅命運就......
亦因為口味問題，我好少相信網站食評，我始終覺得要親自試。有線電視飲食節目介紹下，發現有我喜歡嘅 souffle (香港唔多見)，所以約埋朋友貓奴去試試。
店舖裝飾有格調，情侶拍拖都幾有氣氛，如果點 souffle 的話製作需時唔會好快食完要走。HeSheEat 主打意大利及法國甜，Pana Cotta, Crepe Suzette, Souffle, Mille-feuille & etc.
個人對 Souffle & Cheesecake 有興趣，而貓奴朋友就點咗 Mille-feuille。Souffle 做得非常好，好直咁升起，入口即溶，所以唔駛3分鐘，就一陣風咁比我 K.O.咗，至於個 Cheesecake，可能因為我喜歡重芝士口味，所以略厭味道淡，不過 cake texture 係唔錯嘅。朋友點嘅拿破崙/法式千層酥，可能唔少人會覺得咁少料但係收咁貴。其實我覺得 Mille-feuille 主角唔係 custard cream，應該係嗰啲酥餅，HeSheEat 嘅油皮的確做得好好，每一層都好平均，好鬆脆，唔會 "岩岩參參"，收得貴都合理，你估旺角舖租平咩 ?!!!
有時間的話，我會再來這裡試試 Crepe Suzette。