鍾意食爆谷嘅我，向來都偏愛鹹味多過甜味，因為甜味好快會覺得好飽。不過，香港唔多地方有鹹爆谷賣。上年發現 IFC 嘅 Garrette Popcorn，除咗有我至愛嘅芝士味，仲要佢粒粒爆谷都爆得好靚，所以每次去中上環，必定要去 IFC 入貨。有時會買 Chicago Mix (芝士 + 焦糖)。
可惜，一般唔放得太耐，通常放到一星期左右，否則會變軟。為食嘅我就惟有四出去搵下有咩方法，自己動手整鹹爆谷。
最近喺 759 阿信屋發現有 Microwave popcorn，呢類 popcorn 好多supermarket 都會買到，但係絕對唔夠重口味。可以點解決呢 ?!!
就係無意中喺 UA 戲院搵到寶...Kernel Season's...爆谷調味 (以前UA係一大樽任落唔嬲，可惜而家無咗呢隻調味了)。我喺香港搵咗好耐都搵唔到，最後要屈服比好貴運費喺 EBAY 買。
呢個牌子其實有十多款味，有甜有鹹，我就買咗4款唔同嘅芝士味。雖然至係調味粉，唔及 Garrette Popcorn 嘅咁好味，不過，從今開始我就可以隨時自製鹹味爆谷，要幾重口味都得。重可以整 SHAKE SHAKE 薯條，唔駛等 McDonald 一年得嗰一次嘅嗰包少少味粉。
